Dialecclub
De 10 lede van de dialecclub komme 6 keer per joor bi-j mekaar. Onder ’t genot van koffie, ’n kuukske en ‘n glaeske wödt van alles en nog wat bespraoke.
De dialecclub is d'r um ’t dialec de smaakmakende verbinding te laote zin veur iedereen in Westervoort.! Zo presenteert de dialecclub zich op de Braderie die joorluks in de Darpstraot wödt gehouwe. D'r is dan altied 'n thema woorbi-j 10 vraoge over Westervoort motte wodde beantwoord. Ge kun dan ’n eiges gebrouwe glaeske drank winne.
De organisatie van ‘t traditionele evenement Moesaete is ‘n topper, met veurdrachte en muziekoptrejes deur Westervoorters en 'buutenlanders' in 't eige dialec. De aovond besteet uut ‘t aete van traditionele moes die volges ‘n geheim recep van de Moeshere Martijn en Martin Wieleman is kloorgemaak. Nao de Moes wödt de aovond ingevuld deur getalenteerde inwoners van Westervoort en omstreke, die ’t dialec as smeermiddel gebruuke in hun veurdrachte. Gemiddeld geniete 200 a 250 moesaeters hier joorluks van in Zalencentrum Wieleman.
Maar de dialecclub duut meer. Zo is der metgewark an de vertaling van NIJNTJE (Dick Bruna), in Liemers Dialec. In 2019 uutgebrach deur Uutgeverij Bornmeer.
D'r is ’n buuske uutbedach veur de Jeugd met de historie van Westervoort in gewoon Westervoorts en het Nederlands: de Canon van Westervoort.
Via Erfgoedcentrum Achterhoek en Liemers wödt d'r an gewark um de Westervoortse woordeboeke te laote digitalisere. Dit is belangriek um digitaal toegang te kunne kriege in de toekomst.
En of dah nog nie genoeg is, is d'r ook nog een buukske aover 25 joor moesaete gemak!
Kortum, dialec as smaakmakende verbinding veur Westervoort.